關於我們

2011年幾個年少無知嘅小伙子，上載第一份譜開始，建立自己嘅「結他譜」收藏館，從此對外開放。

仿效我哋由細睇到大嘅歷史網站「結他友」，因為嗰時好多新歌(尤其係廣東歌)都無，我哋就自己執譜放上blogger，好似儲閃卡咁，儲咗大約500份，原來不知不覺吸引咗好多結他友。

Polygon成員都係喺PolyU認識，但就聚集咗好多大學以外嘅朋友。Polygon最初只係大學入面嘅一個3人組合，喺校內舉辦過幾次for fun嘅歌唱比賽；畢業之後我哋開始搞活動 -「MusicStair」，同Polygon嘅結他網友見面，唔單只有鍾意彈結他唱歌嘅人，仲有鍾意聽歌嘅人，我哋定期相約喺PolyU嘅大樓梯，唱歌busking；我哋亦有試過情人節、萬聖節，移師到尖東海旁唱歌，燃燒咗好多個青春晚上。

真嘅，唔係個個鍾意結他都做到結他手，青春過後Polygon各成員都各散東西，又越過高山又越過谷。2026年Polygon成員又再重聚，想念結他之餘，更想念以往因為一支結他、一份譜而認識嘅每個人，我哋決定不如重新嚟過，反正打開個舊鐵盒，我哋仲有好多結他譜喺度！Polygon嘅結他譜從來都係免費公開，或者每份譜嘅回報，就係令我哋認識更多朋友！

你實聽人講過㗎喇：
「譜嚟講」，我哋唔夠原創作曲人準確，但求user-friendly，易上手，令你更加容易愛上結他。所謂雅俗共賞，結他朋友Gathering，不求滿漢全席或者法國Fine Dining，只求鑊氣小炒飲啤酒！當然，我哋都歡迎每位結他友，自帶最好嘅Chord進場，幫助呢一個大家都有份嘅收藏館，修復不完美。

雖然我哋都有成員係教結他，但係我哋想你知道：Polygon唔係你嘅結他導師，而你嘅結他朋友，人同結他嘅交流應該係咁。

人大咗，未必再好似以前咁多朋友，但喺你寂寞emo嘅時候，至少都仲有一支結他、一份譜。對我哋鍾意結他嘅人嚟講，人生「有得彈」，先係冇得彈。